– يووووه بقا
– ايوه بقا اعمليلى الشويتين بتوع كل مره دول
– يا ماما هو اى واحده منتقبه او مختمره يبقى معقده !! ما هو يعنى مش معقول كل ما واحده من خالاتى تقولك كلمه و لا انتى تشوفى واحده تيجى تعيديلى الإسطوانه نفسها بتاع كل يوم !!
– ما هما شايفينك غلط علشان كده بيتكلموا
– هما مين دول اللى شايفينى غلط يا ماما ! هو انا لما البس النقاب و ابقى ملتزمه و لبسى محتشم و ساتر يبقى كده غلط و عيب و حرام و تعقيد !!! طب على فكره بقا هما مبيفهموش حاجة
– بت اتكلمى على خالاتك عدل .. مشوفتيش بنت خالتك امبارح كانت عامله ازاى فى الفرح ! يا هنايا عليها ، و انتى كنتى قاعده مخبيالى وشك بالبتاع اللى انتى لابساه ده .. اهى اتخطبت قبلك و هتتجوز قبلك يا اخرة صبرى
– ماشى يا ماما ربنا يهنيها و يسعدها .. الجواز مش كل حاجه والله ، فى حاجات احسن .. و بعدين مين قالك اصلا انى حتى لو اتقدملى حد دلوقتي هوافق ؟!
– وده ليه ان شاء الله !!
– وربنا لو ابن الوزير نفسه ما هوافق .. عايزانى اتجوز وانا لسه مخلصتش كليتى ؟!
– و فيها ايه يعنى ، تكملى فى بيت جوزك
– انسى ان ده يحصل
بجد الناس بقت غريبه اليومين دول .. الإحترام و الهدوء بقا عندهم خيبه و خام … الإلتزام و التدين بقا تعقيد ..
و المشكله ان الناس بتأثر على عقول بعض بالكلام .. عندهم البنت طالما لبست نقاب يبقى كده فاتها قطر الجواز ..
هو الجواز مش كل حاجه فى الدنيا بس نقول ايه بقا .. عقول ناس !
– ايه الصوت اللى بره ده يا ماما ؟!
– ده عمك و مرات عمك و معاهم محمد
– محمد مين !!
– هو انتى تعرفى كام محمد يا نانسى ! هو واحد ، محمد ابن عمك
– ايه ده هو رجع من ايطاليا امتى ؟!
– رجع امبارح .. اطلعى سلمى عليهم
– حاضر
– انتى رايحه فين ؟!
– هدخل البس نقابى يا ماما
– نقاب ايه ده عمك و مرات عمك
– و محمد ده اعمل فيه ايه ؟! مينفعش يشوفنى من غير نقاب
– آآه .. انا نسيت صح ، ما انتى معقده علطول ، بره و جوه .. ادخل يا اختى ، ادخلى
******
– السلام عليكم
– وعليكم السلام ورحمة الله
– ازيك يا عمى ، ازيك يا عمتو
– الحمد لله يا بنتى
– الحمد لله يا نانسى
– طب وانا مفيش ازيك يا محمد ! موحشتكيش ؟!
– بإحراج و ضيق :- احم .. ازيك يا محمد
– الحمد لله ، انتى اتنقبتى امتى !؟
– من سنتين
– بس انتى لسه صغيره يا نانسى .. ليه يا بنتى تعقدى نفسك و تكتميها من دلوقتي .. امال العرسان يشوفوكى ازاى
– والله انا بقولها كده يا ليلى و هى زى ما انتى شايفه مبتسمعش الكلام
– طب نزلى النقاب .. وحشنى وشك عايزه اشوفه
– بإحراج :- طب ممكن ندخل جوه يا عمتو !
– ليه ! مفيش حد غريب معانا !
