الخطيئة

يناير 7, 2025

0 99 50 دقائق

الخطيئة الجزء الأول

كنت بحب جوزي لدرجة الجنون ، بغير عليه لو اتكلم مع أي واحدة غيري حتى لو كلام عابر ، وكنت بخاف على مشاعره لدرجة إني فهمته ان انا اللي مبخلفش ، مع اني عملت كل الفحوصات والتحاليل واتأكدت اني اقدر اخلف ..

أختي نهلة دكتورة أمراض نسا وتوليد ، درست في أمريكا ، في جامعة شيكاغو ، وحياتها في امريكا خلت شخصيتها عملية جدا وعديمة العواطف تقريبا ، والحاجة التانية أنها بقت متحررة زيادة عن اللزوم وعندها أفكار غريبة ضد تقاليد مجتمعنا وضد مبادئ ديننا ..

نهلة كانت طول الوقت بتلح عليا علشان اطلب الطلاق من مصطفى ، كانت بتقولي اني ماليش ذنب احكم على نفسي اني اعيش طول حياتي من غير اولاد واني هعرف قيمة الكلام دا لما اكبر في السن وفرصتي في الخلفة تضيع ..

كنت برفض كل النصايح دي بشكل قاطع وكنت بقولها انا بحب مصطفى وعمري ما هسيبه ..

بدأت تحاول تقنعني بحاجة تانية ، اني اصارحه بالحقيقة وافهمه أن العيب عنده هو ، يمكن يقدر يتعالج ويبقى عندنا فرصة نخلف ، خصوصا اننا مقتدرين ماديا جدا ، مصطفى صاحب شركة استيراد وتصدير كبيرة ووارث فلوس كتير من أهله ، يعني يقدر يسافر ويتعالج برا مصر .

بس انا برضو مكانش سهل عليا اجرح إحساسه واقوله أنه مبيخلفش ، ولو فيه احتمال ١ في المليون أن العلاج ميجبش نتيجة ساعتها انا متأكدة أن مصطفى هيطلقني لأن هو كمان بيحبني ومش اناني ولو عرف أن هو اللي واقف في طريقي اني ابقى أم مش ممكن يكمل معايا ..

الموضوع كان معقد جدا ، متقفل ومالوش حلول غير اني ارضى بالأمر الواقع وأسلم لفكرة اني خلاص عمري ما هكون أم ، بس دا في حد ذاته كان صعب عليا اوي ..

وفي يوم اسود نهلة جاتلي بفكرة غريبة من أفكارها اللي تودي في داهية وقالتلي هو دا الحل الوحيد علشان تكوني ام وفي نفس الوقت متخسريش مصطفى وتفرحيه ..

وكانت الفكرة الملعونة اللي جابتها نهلة أنها تجيبلي واحد مجهول تماما ، ينــ,,ـام معايه وأبقى حامل منه ، وبعدين هو يمشي ومش هنشوفه تاني ..يتبع

الخطيئة الجزء الثاني

اقل رد فعل كان ممكن اعمله معاها قصاد كلامها المتخلف دا اني اضـ,,ـربها بالأـ,,ـلم على وشها يمكن تفوق ، ودا اللي عملته فعلا ، لكن هي قابلت التصرف دا بهدوء شديد جدا وبدأت تقنعني بالفكرة واحدة واحدة ..

– انتي مصعبة الموضوع على نفسك ليه

= انتي مجنونة ؟ مجنونة ايه انا لسه هسأل ، انتي فعلا مجنونة ، ازاي فكرتي في حاجة زي كدا اصلا ، انتي فاكراني ايه ..

– فاكراكي واحدة بتحب جوزها ومخلصة ليه لدرجة انها فضلت تعيش طول حياتها محرومة من احساس الأمومة عشان متخسروش

– ولما انتي عارفة كدا ، ازاي تتصوري اني ممكن اخون جوزي

= بلاش افكار رجعية متخلفة دي مش اسمها خيانة ، انتي مش هتعملي love story مع راجل غير جوزك ، ولا هتعملي علـ,,ـاقة مستمرة مع حد ، انتي هتحلي مشكلة كبيرة بالطريقة الوحيدة الممكنة ، زي اللي بتتطلق من جوزها ٣ مرات وبتضطر تتجوز راجل تاني عشان تقدر ترجعله ، وبعدين الضرورات تبيح المحظورات

= اوعي تفتحي الموضوع دا معايا تاني ، انتي فاهمة ؟

– انتي حرة بس خليكي عارفة كويس أن مفيش حل تاني غير كدا ، لو نفسك فعلا تكوني أم ..

قفلت الموضوع مع نهلة ، بس هي مبطلتش زن فيه ، كانت عاملة عليا حصار تام ، ومبسطالي الموضوع على الآخر ، مع الوقت ابتديت الين وافكر في الحكاية بيني وبين نفسي بس قدام نهلة كنت لسه متمسكة بموقفي ..

لحد ما أخيرا وافقتها على اللي هي بتقوله ..

– انا موافقة بس انتي متأكدة أن بعد كل دا هبقى حامل ..

= احنا هنختار واحد تحاليل الخصوبة بتاعته كويسة ، ودي معلومة سهل اجيبها ، وانتي معندكيش اي حاجه تمنع الحمل ، كل المطلوب اني احددلك أيام التبويض ، واظبط لقاء بينك وبين الراجل دا ، وتحصل بينكم علاقة حميمية ، بعدها بنسبة كبيرة هتبقي حامل ..

– طب وهو ، هنعمل معاه ايه ..

= احنا هننقي واحد من شريحة معدمة ، هنفهمه أن جوزك مسافر وانتي عندك حرمان وهندفعله مقابل كويس عن الحكاية دي ، هينفذ المطلوب منه ويمشي ، ولا هو هيشوفك تاني ولا انتي هتشوفيه ..

– طب والفضـ,,ـيحة ..

= فين الفضـ,,ـيحة ، انا هجيب واحد من مكان بعيد ، من الصعيد الجواني مثلا ، والمقابلة هتكون في شـ,,ـقة هأجرهالك في اسكندرية ، بعيد عن بيتك في القاهرة خاالص ، متقلقيش ، الحكاية هتعدي ، ولما تخلفي انتي هتبقي مبسوطة وجوزك كمان هيبقى سعيد وهتنسي كل حاجة كأنها محصلتش ، صدقيني احنا بنعمل فيه خدمة كبيرة أوي ..

واقتنعت بكلام نهلة ، وحددنا اليوم ، وروحت الشـ,,ـقة اللي المفروض يحصل فيها كدا ، لبسـ,,ـت لبس عريان واستنيتها تيجي مع الراجل ..

كنت بحتقر نفسي جدا كل ما افكر في اللي انا بعمله ، وبعدين قررت اني مش هكمل في القرف دا ، لبست هدومي وخرجت من الشقة ، بس قابلت نهلة طالعة ومعاها الراجل …. يتبع

الجزء الثالث من هناااااااااااااااا

الخطيئة الجزء الثالث

كنت خلاص قررت اوقف المهزلة اللي بتحصل دي ولبست هدومي وكنت نازلة من الشـ,,ـقة بس نهلة قابلتني على السلم ، وكانت جايبة معاها اللى المفروض أنه هيعمل معايه علاقة عشان ابقى حامل ، قد ايه الفكرة سخيفة ومهينة

– انتي رايحة فين يا منال ، رايحة فين يا مجنونة

= ماشية يا نهلة ، رايحة اعيش تحت رجلين جوزي اللي بيحبني ونفسه يجيبلي نجمة من السما ، مش مهم الأولاد ، مش عايزة أولاد هو ابني وجوزي ، بس لا هخونه ولا ههين نفسي تحت أي مسمى

– ما بلاش الكلام العبيط دا بقى ، الدنيا اتطورت دلوقتي والعالم كله بيحسبها بالعقل ، احنا مش في العشرينات يا حبيبتي احنا دلوقتي في سنة ٧٢ ، وانتي مضطرة ، يالا يا منال ، يالا يا حبيبتي ، ادخلي استني في اوضة النوم الراجل واقف تحت مستنيني انزل اندهله ، ادخلي البسي قميص نوم حلو كدا وحطي شوية برفان وشوية مكياچ في وشك ، بلاش هو يحس انك بتعملي دا غصب عنك

= يا سلام ، هو انا كمان هخاف على شعوره ، ما يحس وللا يتـ,,ـحرق ، هو انتي ليه بتتكلمي معايه كإني متأجرة

– يا حبيبتي هو اللي متأجر ، انتي سته وست أهله ، دا واحد صايع ، سواق تاكسي بيجري على خمس عيال ، وانا مفهماه زي ما احنا اتفقنا أن جوزك مسافر وانتي محتاجة علاقة عابرة كدا عشان الحرمان اللي انتي عايشة فيه ، وهو اخد مبلغ مش بطال قصاد الخدمة دي ، هينفذ المطلوب منه ويغور في ستين داهية ، لا انتي هتشوفيه تاني ولا هو هيشوفك والموضوع كله هيموت ، مش من مصلحتنا بقى ندخل الشك في دماغه ونخليه يركز معانا في اللي احنا بنعمله انتي برضو بنت ناس ، واسمك واسم عيلتك وعيلة جوزك مينفعش يتلطوا في حكاية زي دي

= خلصيني يا نهلة ، انا عايزة افوق من الكابوـ,,ـس دا بأي شكل ، ارجوكي خلصيني

– ماشي يا حبيبتى ، انا هنزل اجيب اسمه ايه دا عماد باين اللي واقف تحت وانتي ادخلي اوـ,,ـضة النوم كدا دلعي نفسك وخليكي متعاونة عشان المهمة تخلص بسرعة ، انتي متجوزة بقالك عشر سنين ، ومش انا اللي هقولك أن الحكاية دي بالذات مبتحصلش من غير رضا .. يالا يا قمر ، يالا يا حبيبتي ، البسي اسود ها ، بيبقى تحفة عليكي .. بقولك ايه يا منال ، فيه ازازة ويسكي جوا انا جايبهالك ، انا عارفة انك مبتشربيش ، بس حاولي تاخديلك كاس كدا عشان تفكي وتبقي براحتك ماشي ؟

ونزلت نهلة وانا دخلت اوضة النوم ، غيرت هدومي وعملت كل اللي هي قالت عليه ، وقفت دماغي تماما ، وخدت كاسين ، وحسيت فعلا اني بدأت انتعش واحس اني خفيفة اوي ، الخنقة اللي كنت حاسة بيها ابتدت تختفي ، هي ليلة سودا وهتعدي وهنساها ، انا عارفة اني هنساها ..

شوية ودخـ,,ـلت عليا نهلة ..

– ايه القمر دا ، يا بخته ابن المحظوظة ، مكانش ينفع حتى يحلم بليلة زي دي ، والله انا لو مكانه ابيع اللي ورايا واللي قدامي قصاد ليلة زي دي مش انا اللي اخد فلوس

= يا نهلة قولتلك ١٠٠ مرة بلاش كلامك دا ، بيحسسني أن انا رخيصة بجد

– بهزر معاكي يا بنتي مالك ، ما تفكي بقى ، يالا ، الواد واقف برا ، ليلتكو سعيدة انتو بقى

= ايه دا انتي رايحة فين

– هلف ساعة كدا بالعربية وهرجعلك تاني

= لا متسبينيش لوحدي معاه

– ايه شغل العيال دا ، مينفعش طبعا ، لازم انا اكون برا الشقة كلها ، اجمدي بقى يا منال وخلصينا من الفيلم دا ، يالا ، انا نازلة ساعة وراجعالك تاني

ونزلت نهلة ، دقيقتين بعد ما نزلت سمعت باب الأوضة بيتفتح ، كنت برتعش من الخوف ودقات قلبي بتزيد ..

دخل الأوضة ، كان بيغني انا كل ما اقول التوبة ، مكنتش قادرة ابص في وشه ، كنت دافنه وشي في المخدة من الكسوف ، بدأ يغازلني ..
– دا ايه الهنا اللي انا فيه دا ، انا مش شايف وشك صحيح بس باين من جسـ,,ـمك اللي زي الشمع دا انك قمر ، شكلك بنت ناس كمان ، اصل قميص النوم دا وريحة البرفان الغالي اللي طالعة منك دول ميقدرش على تمنهم غير ولاد الناس ، لعلمك انا كمان ابن ناس ، انا خريج كلية آداب ، وكنت معيد في الجامعة ، بس ظروفي صعبة شوية ، هبقى احكيلك حكايتي بعدين لو مهتمة تسمعيها يعني ، اصل النكد يعني غير مستحب في ليلة زي دي ، لعلمك انا متجوز ومخلص لام العيال اوي ، ولولا العوزة مكنتش عملت كدا بس يالا ، بقولك ايه ما هو كدا مينفعش ، انا عايز اشوف وش الجميل برضو ، لازم نتعرف ، ونتكلم واناغشك وتناغشيني ، محسوبك فؤاد ..

فؤاد .. كل اللي كنت بفكر فيه طلع صح ، انا مش ممكن انسى صوته حتى لو قعدت عشر سنين ما اسمعوش ، بصيت في وشه واتصدمت وهو اتصدم ، كوباية الويسكي وقعت من أيده على الأرض

– انت يا فؤاد ؟؟

= منال !!!…. يتبع

الخطيئة الجزء الرابع

– بعد كل السنين دي يا فؤاد الوشوش تتقابل تاني

= لسه الدنيا مصممة تسخر مني ومنك يا منال ، انتي بتغطي نفسك ليه

– مش قادرة ، مش عايزاك تشوفني كدا

= زمان انتي شوفتيني في وضع أسوأ من دا ، الست لما بتحب راجل يا منال بتشوفه الراجل الوحيد في الدنيا ، بتشوفه أمانها وسندها ، بيتهيألها انه يقدر يعمل أي حاجة علشانها ، يقدر يشيل الهرم الكبير بإيد وأبو الهول بالإيد التانية ، لكن لما الراجل دا بيتكسر قدامها العالم كله بيتكـ,,ـسر معاه

– عملت ايه بعد ما سيبتني ؟

= قصدك بعد ما الخدامين بتوعكم رموني في الشارع ، كانوا بيفهمونا في الستينات ان الزمان اتغير وان الروس اتساوت ، الدنيا هي الدنيا يا منال ، باشاوات الملكية هما باشاوات الناصرية هما باشاوات دلوقتي ، مفيش فرق بين فاروق وعبد الناصر ولا فيه فرق بين عبد الناصر والسادات ، كنت فاكر ان ابوكي باشا قديم من بتوع الطرابيش ومادام قلع الطربوش يبقى خلاص ، عرفت أن الباشا بيفضل باشا والغلبان بيعيش ويموت غلبان ، ابوكي رماني برا بيته لما اتجننت في عقلي وروحت اتقدملك .

وعشان يضمن اني ما الفش عليكي تاني رماني في المعتقل بتهمة اني شيوعي ، شوفت أسود أيام حياتي جوا السـ,,ـجن الحربي ، كان متوصي عليا توصية جامدة أوي ، اول ما دخلت السجن قالولي انسى اسمك خالص واختار لنفسك اسم حريمي نناديك بيه ، في الأول خدت الموضوع على كرامتي ورفضت ، بس مع اول طريحة بالكرباج ركعت ، تعرفي سميت نفسي ايه ؟ سميت نفسي منال ، عشان افضل اسمع اسمك طول الوقت حتى وانا بتهان ، كان فيه عسكري في السجن الحربي اسمه حجازي ، كان عسكري جاهل وحاقد على كل المتعلمين ، كان حاسس بعقدة نقص ناحية أي حد فاهم اكتر منه ، العسكري دا كانت هوايته المفضلة انه يذلني ، كان لما يتزنق في حمام مايه انشاله في نص الليل يصحيني عشان يبول على وشي ، تخيلي الذل والمرمطة اللي انا شوفتهم يا منال

– انا آسفة ، انا آسفة أوي يا فؤاد ، كل دا حصلك بسببي

= كنت بقابل كل دا برضا ، كنت مؤمن أن كل صاحب قضية لازم يقدم تمن ، عارفة يا منال ، انا اتضربت كتير اوي في السجن الحربي ، اتضربت على وشي وعلى قفايا بالعصايا وبالكرباج ، بس محسيتش بالوجع غير لما خرجت وعرفت انك اتجوزتي ، ودي لحظة الألم المشتركة في حياة كل صاحب رسالة ، لما يعرف أن تعبه كله كان من غير مقابل ..

– بابا غصبني على الجوازة ، مكنتش اقدر اقف في وشه ، كان هيطردني من البيت زي ما عمل مع نهلة وانا مش قوية زي نهلة عشان اقدر اتحمل عواقب قرار زي دا

= نهلة مين ، هي اللي كانت هنا دي تبقى اختك ، غريب اوي الدور اللي بتلعبه معاكي دا ، بس وهو ايه في حياتنا يعني مش غريب ، حبيتي بعدي يا منال

……….-

= تبقي حبيتي ، يا معوض الخسران يا رب ، اشوف وشك بخير يا منال ، دا لو كان مكتوبلنا نتقابل تاني

– رايح فين يا فؤاد ؟

= ماشي ، انا مش قادر ابص في وشك تاني ، بعد ما كنت فؤاد اللي بتحبيه وبتحترميه وشايفاه أعظم راجل في الدنيا ، تشوفيني دلوقتى جاي اخد عرقي في ليلة وسخة زي التور الطالوقة

– اللي انت بتعمله مش أوحش من اللي انا بعمله ، الدنيا لوت دراعك زي ما لوت دراعي ومشيتنا احنا الاتنين في طريق عمرنا ما حبيناه ، بس انا دلوقتي عايزاك يا فؤاد ، عايزة احضنك ، ينفع ؟؟

عشر سنين من حياتي اتكسروا زي لوح الإزاز اول ما شوفت فؤاد تاني ، كنت فاهمة اني نسيت واني بحب جوزي ، كنت فاهمة أن الماضي كله مات ، بس الحقيقة ان الماضي مبيموتش ، الماضي بيتشال في مكان بعيد زي هدوم الشتا ، وبيطلع غصب عننا اول ما برودة الحياة تلسعنا ..

كنت عطشانه فؤاد ، لسه ريحتي في حضنه من عشر سنين ، لسه طعم شفايفه ما اتغيرش ، لسه دقات قلبه متلحنة على اسمي ، دخلت جواه ودخل جوايا ، ملقيتش حد غيري جواه ، وملقاش حد غيره جوايا ..

في الليلة دي انا خدت حقي من الحياة ، مديت ايديا وقفت كل ساعات العالم ، وقفت الأرض نفسها عن الدوران ، وسرقت سعادتي من ايد الدنيا ، كنت طايرة ، كانت كل حاجة ليلتها بتقول كلام كتير ، أنفاسه السخنة فوق وشي ، لمسة صوابعه لكل سنتي من جسمي ، كل التفاصيل كانت بتتكلم ، بتقوله بحبك وعمري ما حبيت إنسان غيرك ..

وفضلت معاه لحد الصبح ، والصبح الصخرة اللي بتتكسر فوقها كل الأحلام ..

كان حلم جميل وصحيت منه على نفس الواقع ..

ولحد هنا وانتهى دور نهلة في حياتي ، كنت فاهمة وانا مع فؤاد اني هاخد تعويض عن كل اللي شوفته في العشر سنين اللي فاتوا في ليلة واحدة ..

بس دا مكانش حقيقي للأسف ..

حملت ، مصطفى كان فرحان جدا ، حبه ليا وحنانه عليا زادوا الضعف ، كان محتار يفرحني ازاي ويعمل ايه علشاني ودا كان محسسني بالذنب ..

كنت مشتتة ، ضايعة ، مقسومة ما بين اتنين ، اصعب حاجة على أي ست أنها تقسم نفسها على راجلين ..

كتير كنت بقرر ما اشوفش فؤاد تاني ، بس مكنتش بقدر ، كان بيوحشني ، وكنت بروحله ، في نفس الشقة اللي اتقابلنا فيها اول مرة بعد عشر سنين ..

لحد ما حصلت المصيبة ..

جالي ظرف مقفول على البيت وعليه توقيع فؤاد ، ستر ربنا أن مصطفى مكانش في البيت في الوقت دا ، فتحت الظرف لقيت فيه صوري مع فؤاد ، صور في أوضاع حميمية ..

للأسف ، فؤاد بيبتزني ….. يتبع

الخطيئة الجزء الخامس

خرجت من عنده مش شايفة قدامي ، كنت منهارة من العياط ، مكانش ينفع اروح البيت وانا في الحالة دي ، ملقيتش مكان اروحه غير شقة نهلة ، كانت واخدة شقة في الهرم عايشة فيها لوحدها ، روحتلها وحكيتلها كل حاجة ، اترميت في حضـ,,ـنها ، كنت محتاجة الحضن دا اوي ، اول مرة احس ان نهلة حنينة بالشكل دا ، عملتلي عصير ليمون وقالتلي لازم نهدا ونفكر ، المشكلة ما اتحلتش باللي انتي عملتيه المشكلة بدأت ، مش بعيد يستحلا اللعبة وينطلك كل يومين عشان يبتزك ، انتي كدا استقرارك النفسي والاجتماعي بقوا في خـ,,ـطر ، لازم نتصرف يا منال ..

– هعمل ايه يا نهلة

= الشيك ، اول حاجة لازم نعملها أننا نوقف صرف الشيك ، حلو أن النهارده الجمعة والبنك في إجازة ، دا هيدينا شوية وقت ، الخطوة الجاية أن فؤاد دا يختفي

– يختفي ازاي يعني ، يرجع المعتقل تاني

= ياريت ، بس الزمن اتغير خلاص ، السادات طالعلي بتقليعة جديدة وقال ايه بيهد السجون ، السجون دي مهمة عشان تلم الأشكال اللي وجودهم برا خطر ، وبعدين حتى لو سجناه ، سكوته مش مضمون ، اي كلمة هيقولها لاي حد كفيلة تهد حياتك كلها

– طب هنعمل ايه يا نهلة ؟

= لازم فؤاد يموت .. والنهارده …. يتبع الجزء

السابق1 من 4التالي

تابع المقال

يناير 7, 2025

0 99 50 دقائق